माघ १५, काठमाडाैं । मकवानपुरको हेटौँडामा सोमबार ट्रिपरले मोटरसाइकललाई ठक्कर दिँदा एक युवाको ज्यान गएको छ । मृत्यु हुनेमा मकवानपुरगढी गाउँपालिका धमिले घर भई हेटौँडा उपमहानगरपालिका– १७ दाबिले बस्ने २८ वर्षीय हरि पनेरु छन् ।
पनेरु चढेको ना. २६प ४४२५ नम्बरको मोटरसाइकललाई मधेश प्रदेश ०३ ००१ ख ७९०३ नम्बरको ट्रिपरले हेटौँडा उपमहानगरपालिका– १७ गैरीगाउँमा ठक्कर दिएको थियो ।
उनी मोटरसाइकलमा सालक पार्कबाट चौघडातर्फ आउँदै गरेका थिए । पनेरुको घटनास्थलमै मृत्यु भएको जिल्ला प्रहरी कार्यालय मकवानपुरले जनाएको छ ।
मोटरसाइकलमा पछाडि बसेकी पनेरुकी श्रीमती सामान्य घाइते भएकी छन् । उनको हेटौँडा अस्पतालमा उपचार भइरहेको प्रहरीले जनाएको छ । ट्रिपर चालकलाई प्रहरीले नियन्त्रणमा लिएको छ ।
