१० माघ, काठमाडौं । संघीय संसदका पदाधिकारीहरुले संसदको बजेट अपर्याप्त रहेको बताएका छन् । सांसदहरुले सभामुख देवराज घिमिरेसहित प्रतिनिधित्व गर्ने राजनीतिक दलका प्रमुख सचेतक र सचेतकहरुले प्रधानमन्त्री पुष्पकमल दाहाल प्रचण्ड र अर्थमन्त्री प्रकाशशरण महतलाई सामूहिक भेटेर बजेटको आकार बढाउन आग्रह गर्ने भएका छन् ।
गत आर्थिक वर्षमा एक अर्ब ८२ करोड बजेट माग गरेकोमा सरकारले एक अर्ब २२ करोड मात्र दिएको थियो । आगामी आर्थिक वर्षका लागि एक अर्ब ८७ करोड बजेट आवश्यक पर्ने संसद सचिवालयको आकलन छ । बजेट सिलिङको तयारी भइरहेकाले प्रधानमन्त्री र अर्थमन्त्रीलाई भेटेर बजेटको आकार बढाउन आग्रह गर्न लागिएको संसद सचिवालयले जनाएको छ ।
सिंहदरवारस्थित सभामुखको कार्यकक्षमा मंगलबार सभामुख घिमिरेसहित राजनीतिक दलका प्रमुख सचेतक र सचेतकहरुको छलफल थियो । उक्त छलफलमा संसदको बजेट बढाउन प्रधानमन्त्री र अर्थमन्त्रीलाई संयुक्त रुपमा भेटेर आग्रह गर्ने सहमति भएको जनाइएको छ ।
यसै सन्दर्भमा प्रधानमन्त्री प्रचण्ड र अर्थमन्त्री महतसँग एकसाथ भेटेर छलफल गर्ने सहमति संसदका पदाधिकारीहरुका बीचमा भएको जनाइएको छ । त्यसअनुसार भेटका लागि सभामुख घिमिरेले समन्वय गरिरहेका बताइन्छ ।
