सर्लाहीको बरहथवामा भएको विवादका क्रममा झडप हुँदा एक जनाको मृत्यु

काठमाडाैं , पुस २० । सर्लाहीको बरहथवामा प्राथमिक अस्पतालको विषयमा भएको विवादका क्रममा झडप हुँदा एक जनाको मृत्यु भएको छ । आन्दोलनकारीले नगरपालिका कार्यालय तथा नगर प्रमुख कल्पनाकुमारी कटुवालको घरमा ढुंगामुढा गरेपछि प्रहरीले अश्रुसेल र हवाई फायर खोलेका थिए । त्यसक्रममा एक युवकको ज्यान गएको हो ।

आन्दोलनकारीले प्रहरीको गोली लागेर मृत्यु भएको दाबी गरिरहेका छन् । तर प्रमुख जिल्ला अधिकारी कोमलप्रसाद धमलाले अहिलेसम्म मृत्युको कारण खुल्न नसकेको जनाएको छ ।

बरहथवाको नगर कार्यपालिका बैठकले केही समयअघि वडा नम्बर ६ मा रहेको प्राथमिक स्वास्थ्य केन्द्र स्तरोन्नति गरी ५० बेडको बनाउन प्रदेश सरकारलाई हस्तान्तरण गर्ने निर्णय गरेको थियो ।

उक्त निर्णयबारे छलफलका लागि नगरमा शुक्रबार सर्वदलीय बैठक बोलाइएको थियो । कांग्रेससहितका दलले नगर कार्यपालिकाको निर्णय कार्यान्वयन गर्न माग गर्दै प्रदर्शन गरेका थिए ।