सुर्खेतको विरेन्द्रनगरमा ३४ औं पुरुष भलिवल प्रतियोगिता हुने

काठमाडौं । कार्तिक १८, नेपालको राष्ट्रिय खेल भलिवलको विकास र विस्तारको लागि संघले केन्द्रिय कार्यक्रम कार्यन्वयन गर्ने उद्देश्यले आउदो पुष २० देखि २५ गते सम्म सुर्खेतको विरेन्द्रनगरमा ३४ औं पुरुष भलिवल प्रतियोगिताको आयोजना गर्ने भएको छ ।
नेपालका विभिन्न जिल्ला, प्रदेशमा रहेका नव प्रतिभावान खेलाडीहरुको पहिचान गरी राष्ट्रिय टिम निर्माण गर्न संघको आयोजनामा, कर्णाली प्रदेश भलिवल संघको व्यवस्थापनमा सात प्रदेश र तिन विभागीय टिम गरी १० टिमको सहभागितामा सुर्खेतको विरेन्द्रनगरमा ३४ औं पुरुष भलिवल प्रतियोगिताको आयोजना गर्न लागिएको हो ।
प्रतियोगितामा सम्पूर्ण खेलाडी एवं अफिसीयलहरुको खर्च कर्णाली प्रदेश भलिवल संघले व्यवस्थापन गर्ने भएको छ । उक्त पुरुष भलिवल सम्पन्न गर्नकालागि कर्णाली प्रदेश सरकारका तर्फबाट ४४ लाख ५सय ६० रुपैंया, नेपाल भलिवल संघले वल, नेट र नगद रु. २ लाख सहयोग गर्ने वताईएको छ । त्यसैगरी उक्त प्रतियोगिताका लागि विभिन्न संघ संस्था र खेलप्रमी सम्पूर्णबाट सहयोग हुने आयोजकले जनाएको छ ।
उक्त प्रतियोगितामा प्रथम, द्धितिय र तृतिय हुने टिमलाई नगद रु. १,००,०००।– ,रु. ५०,०००।– र रु. २५,०००।– प्रदान गरिनेछ । त्यस्तै विधागत तर्फ रु. ५ / ५ हजार र सर्वोत्कृष्ट खेलाडीलाई नगद रु. १०,०००।– प्रदान गरिनेछ ।
कर्णाली प्रदेशको पर्यटन व्यवसायलाई उजागर गर्ने उद्देश्यका साथ आयोजना हुन लागेको उक्त प्रतियोगिता सम्पन्न गर्न अनुमानित ७० देखि ८० लाख सम्म लाग्ने आयोजकले काठमाडौंमा पत्रकार सम्मेलन मार्फत जानकारी गराएको हो ।