काठमाडौं । त्रिभुवन विश्वविद्यालय (त्रिवि) अन्तर्गतका क्याम्पसमा चौध वर्षपछि हुन लागेको स्ववियु निर्वाचनमा विद्यार्थीहरूको उल्लासमय सहभागिता देखिएको छ । सार्वजनिक बिदाको दिन भए पनि शनिबार देशभरका त्रिवि सम्बन्धन क्याम्पसमा उम्मेदवारी मनोनयन दर्ताका गरेका छन् ।
हजारौं विद्यार्थी, अध्यापक र कर्मचारी स्ववियु निर्वाचनको काममा दिनभर व्यस्त रहे । क्याम्पस प्रमुखहरूका अनुसार राति अबेरसम्म प्रत्यक्ष र समानुपातिकतर्फ उम्मेदवारी दर्ताको काम गरिएको थियो । निर्वाचनलाई लक्षित गरी क्याम्पस परिसरमा प्रहरी परिचालन गरिएको थियो । स्ववियु निर्वाचन केन्द्रीय अनुगमन समितिका सदस्यसचिव पशुपति अधिकारीले उत्साहजनक रूपमा उम्मेदवारी दर्ता भएको प्रतिक्रिया दिए ।
करिब ५० वटा आंगिक क्याम्पसमा निर्वाचन समितिले तोकेकै समयमा उम्मेदवारी दर्ताको काम सकिएको थियो भने सातवटामा राति अबेरसम्म दर्ताको काम गरिएको थियो । कीर्तिपुर, मीनभवनलगायत क्याम्पसमा राति अबेरसम्म उम्मेदवारी टुंगो लगाइएको हो । गोरखा क्याम्पस र धनकुटा बहुमुखी क्याम्पसमा भने सभापतिलगायत पदाधिकारी निर्विरोध निर्वाचित भएको समितिले जनाएको छ । गोरखामा अखिल क्रान्तिकारी र धनकुटामा अनेरास्ववियुका उम्मेदवार निर्वाचित भएका छन् ।
पोखराको पृथ्वीनारायण, काठमाडौंको त्रिचन्द्र र कीर्तिपुरको आयुर्वेद क्याम्पसमा भर्ना विवादका कारण मनोनयन दर्ताको प्रक्रिया सुरु हुन सकेको छैन । यी क्याम्पसमा विभिन्न विद्यार्थी संगठनले तालाबन्दी गरेका छन ।
यसबाहेक देशभरका सामुदायिक क्याम्पसमा पनि उम्मेदवारी दर्ता सकिएको बताइएको छ । ‘१०–१२ वटा सामुदायिकमा निर्विरोध निर्वाचित भएको रिपोर्ट आएको छ, विवरण संकलन जारी छ,’ उनले भने । डोल्पा, धादिङ, रुकुम, गोरखा, सिन्धुपाल्चोक र पाँचथर जिल्लाका केही सामुदायिक क्याम्पसमा स्ववियु पदाधिकारी निर्विरोध चयन भएको समितिले जनाएको छ । देशभर त्रिविका ५ सय २३ सामुदायिक क्याम्पस छन । त्रिविको विद्यार्थी कल्याण तथा खेलकुद परिषद्ले चैत ५ मा स्ववियु निर्वाचन गर्न ६२ आंगिकसहित सबै क्याम्पसलाई निर्देशन दिएको थियो ।
मिश्रित निर्वाचन प्रणाली (प्रत्यक्ष र समानुपातिक) बाट स्ववियु चयन गर्ने व्यवस्था छ । अध्यक्ष, सचिव, कोषाध्यक्ष र केही सदस्य प्रत्यक्षबाट चयन हुन्छन् भने उपाध्यक्ष, सहसचिवसहित केही सदस्य समानुपातिक निर्वाचन प्रणालीबाट निर्वाचित हुनेछन । क्याम्पसको विद्यार्थी संख्याअनुसार ११ देखि २१ सदस्यीय स्ववियु रहने व्यवस्था छ ।
रत्नराज्यलक्ष्मी क्याम्पस प्रदर्शनीमार्ग उम्मेदवारी दर्ताका क्रममा शनिबार दुई विद्यार्थी समूहबीच झडप भएको थियो । एकीकृत समाजवादीनिकट विद्यार्थीले एमालेनिकट अनेरास्ववियुका विद्यार्थीमाथि खुकुरी हानेको आरोप छ । अनेरास्ववियुका इकाइ अध्यक्ष लोकेश खड्काले आफ्ना तीन जना साथी घाइते भएको जनाए । एकीकृत समाजवादीनिकट अखिलका अध्यक्ष सुदेश पराजुलीले क्याम्पस प्रमुख र निर्वाचन अधिकृत मिलेर फर्जी विद्यार्थी भर्ना गरेकाले विवाद भएको बताए ।
काठमाडौंका २२ आंगिकमध्ये २० क्याम्पसमा उम्मेदवारी दर्ता भएको निर्वाचन समितिले जनाएको छ । दलमा आबद्ध नभएका स्वतन्त्र विद्यार्थीले समूह बनाएर उम्मेदवारी दिएको क्याम्पसहरूले जनाएका छन ।
आइतबार उम्मेदवारको नामावलीउपर दाबीविरोध गर्ने, छानबिन गरी नामावली सार्वजनिक गर्ने समयतालिका तोकिएको छ । उम्मेदवारी फिर्ता लिने समय सकिएपछि सोमबार अन्तिम नामावली सार्वजनिक गरेर प्रचारप्रसारको समय सुरु हुनेछ । निर्वाचनमा उम्मेदवार बन्न २८ वर्षे उमेरहद लागू गरिएको छ । उम्मेदवारको अन्तिम नामावली प्रकाशित भएपछि मात्रै प्रचारप्रसार गर्न पाइने निर्वाचन निर्देशिकामा उल्लेख छ ।
