सिन्धुली । शनिबार सिन्धुलीमाढीमा रहेका तीन ठुला क्याम्पस सहित चारवटा क्याम्पसमा स्ववियु निर्वाचन सम्पन्न भएको छ ।
ढुंग्रेबासस्थित सिन्धुली बहुमुखी क्याम्पसमा एमाले निकट अनेरास्ववियु र माओवादी केन्द्र निकट अनेरास्ववियु क्रान्तिकारीका उम्मेदवार निर्वाचित भएका छन । नेपाली कांग्रेस निकट नेपाल विद्यार्थी संघ (नेबिसंघ) भने क्लिन स्विप भएको छ । स्ववियु सभापतिमा अनेरास्ववियुका तुलसी राम भुजेल २ सय ८७ मतले विजयी भएका छन् ।
सचिवमा अखिल क्रान्तिकारीका विष्णु पाण्डे ३ सय ४३ मतले विजयी भएका छन् । कोषाध्यक्षमा अखिल क्रान्तिकारीका उम्मेदवार विमला सिदाली ३ सय ३० मतले विजयी भएकी छिन् ।
सदस्यमा अनेरास्ववियुका सेबन्त हरि बख्रेल, अखिल क्रान्तिकारीका कौशल चौलागाई र अनेरास्ववियुका इच्छा कुमारी बम्जन विजयी भएकी छिन् ।
त्यसैगरी सदस्यमा अखिल क्रान्तिकारीका निकेश गौतम अनेरास्ववियुका चेत बहादुर श्रेष्ठ, अखिल क्रान्तिकारीकी निरा यस्माली मगर र अनेरास्ववियुकी टंक कुमारी खड्का विजयी भएकी छिन।
गौमती बहुमुखी क्याम्पसमा भएको स्ववियु निर्वाचनमा नेविसंघका बिक्रम तामाङ् सभापतिमा विजयी भएका छन् । गौमतीमा सभापति सचिव र कोषाध्यक्ष सहित दुई सदस्य नेविसंघले जितेको छ भने तीनजना स्ववियु सदस्य अनेरास्ववियु र दुइ सदस्य अनेरास्ववियु क्रान्तिकारीले जितेको छ ।
सिद्दज्योती शिक्षा क्याम्पस, फोस्रेटारमा सम्पन्न स्ववियु निर्वाचनमा नेपाली काग्रेस निकट नेविसंघको प्यानल निर्वाचित भएको छ । भिमज्योती शिक्षा क्याम्पस खुर्कोटमा अखिल र अखिल क्रान्तिकारीको गठबन्धन निर्वाचित भएको छ ।
