काठमाडौं । बालबालिकाको स्वास्थ्यलाई वेवास्ता गर्दै म्याद सकिन लागेका हर्लिक्स विद्यालयका बालकालिकालाई वितरण गरिएको छ । काठमाडौं सहति देशका केही विद्यालयमा ‘ब्राण्ड प्रमोशन’को नाममा उपभोग्य मिति सकिन लागेको बहुराष्ट्रिय कम्पनी हर्लिक्सका उत्पदान वितरण गरेको पाइएको छ ।
आइतबार चन्द्रागिरि नगरपालिकाका केही विद्यालयमा हर्लिक्स नेपालको टी–सर्ट लगाएका व्यक्तिहरुले स्कुले विद्यार्थीलाई लाम लगाएर हर्लिक्स बाँढेका थिए ।
बाँढिएका अधिकांश हर्लिक्सको बाहिरपट्टी लेखिएको उपभोग्य मिति भने सकिन केही दिन मात्र बाँकी रहेको पाइएको छ ।
उपभोग्य अवधिको मिति केही सकिन केही दिन वा एक महिना मात्रै बाँकी रहेका हर्लिक्सका बट्टा वितरण गरिएको हो । यसबारेमा हर्लिक्स नेपालका प्रतिनिधिसंग प्रतिकृया माग्दा उत्पादनको बजार प्रवद्र्धन गर्न हर्लिक्स बाँढिएको बताए ।
उनका अनुसार चन्द्रागिरिका २ वटा विद्यालयमा कक्षा २ देखी १० सम्म अध्ययनरत विद्यार्थीलाई हर्लिक्स वितरण गरिएको थियो ।
बिहान पानीको बोतल घाँटीमा झुण्ड्याएर स्कुल पठाएका छोरा छोरीले साँझ घर फर्कँदा साथमा हर्लिक्सको बट्टा बोकेर फर्केपछि अभिभावकहरू आस्चार्यमा परेका छन ।
बजार प्रवद्र्धनको नाममा उपभोग्य मिति गुज्रनै लागेका उत्पदान भिडाएर पठाउँदा उनीहरूको स्वास्थ्यमा विद्यालय र बहुराष्ट्रिय कम्पनीले लापरबाही गरेको अभिभावकहरूले गुनासो गरेका छन् । उनीहरूले उपभोग्य मिति सकिन लागेका मौज्दात सामान वितरण गरेर बहुराष्ट्रिय कम्पनीले सस्तो लोकप्रियता बटुल्न खोजेको समेत आरोप लगाएका छन् ।
कतिपय अभिभावकहरूले सो विषयमा विद्यालयमा उजुरी गरेको समेत बताए । हर्लिक्स बोकेर घर पुगेका एक जना विद्यार्थीका अभिभावकले भने बजार प्रवद्र्धन नै गर्नु परे किन उपभोग्य मिति गुज्रिन लाग्दा हर्लिक्स दिइयो ?, के हाम्रा छोराछोरी बहुराष्ट्रिय कम्पनीका प्रयोगशाला हुन् ? ती अभिभावकले विद्यार्थीहरूको स्वास्थ्य संवेदनशीलताको ख्याल नै नगरी यस्ता खालका गतिविधि गरिनु दुःखद भएको भन्दै विद्यालयले यस्ता गतिविधि रोक्नुपर्ने बताए ।
यस्तै, सुनसरीस्थित कृस्टल एकेडेमीमा पनि सोही कम्पनिको हर्लिक्स वितरण गरेको पाइएको छ । उक्त स्कुलमा कक्षा ३ देखि कक्षा ५ सम्मका विद्यार्थीलाई प्रती व्यक्ति आधा केजी र कक्षा ६ देखि कक्षा १० सम्मका विद्यार्थीलाई एक केजीको प्याकका दरले बितरण गरिएको विद्यालय स्रोतले जनाएको छ । वितरण गरिएको हर्लिक्सकाे म्याद एक महिना मात्रै रहेको जनाइएको छ ।
