काठमाडौं ।काठमाडौं महानगरपालिकाले विद्यालयहरूले किताब र पोसाक बेचेको गुनासो आएको भन्दै त्यसो नर्गन आग्रह गरेको छ ।
विद्यालयले किताब र पोसाक बेच्नु संस्थागत विद्यालय मापदण्ड तथा सञ्चालन निर्देशिका २०६९ विपरीत भएको काठमाडौं महानगरपालिकाले जारी गरेको परिपत्रमा उल्लेख छ ।
यस विषयमा २०७९ चैत १७ गते नै परिपत्र गरिएकाे भएपनि मेयर बालेनले आज फेसबुमार्फत उक्त कुरा राखेपछि चर्चा भएकाे छ । ‘विद्यालय आफैंले किताब बेच्ने गरेको र पोसाकसमेत सम्बन्धित ठाउँबाट नै किन्नु भनेर अभिभावकलाई बाध्य गराएको गुनासो पटक–पटक आइरहेको छ,’ उनले लेखेका छन । ‘यस्तो कार्य संस्थागत विद्यालय मापदण्ड तथा सञ्चालन निर्देशिका २०६९ अनुसार दण्डनीय भएको स्मरण गराइन्छ।’
उनले सबै विद्यालयहरूलाई निर्देशिकाअनुसार काम गर्नसमेत अनुरोध गरेका छन्।
महानगरको शिक्षा विभागका शिक्षा अधिकारी रामप्रसाद सुवेदीले गत चैत १७ मै परिपत्र गर्दै किताब विद्यालयले नबेच्न र पोसाक तोकिएकै ठाउँमा किन्न अभिभावकलाई बाध्य नपार्न आग्रह गरेका थिए।
महानगरले किताब बेच्ने विद्यालयलाई कारबाही गर्नेसमेत चेतावनी दिएको छ ।
