काठमाडाै । दैलेख जिल्ला दैलेखको गुराँस गाउँपालिका-४ तालपोखरीमा ग्यास सिलिन्डर बोकेको मालबाहक मिनिट्रक दुर्घटना हुँदा तीन जनाको मृत्यु भएको छ।
नेपालगञ्जबाट दैलेखतर्फ आउँदै गरेको मनकामना ग्यास सिलिन्डर बोकेको भे १ क २२०१ नम्बरको ट्रक बिहान ८:४० बजे दुर्घटना हुँदा उनीहरूको मृत्यु भएको दैलेख प्रहरीका डीएसपी किशोर लम्सालले जानकारी दिए।
उनका अनुसार दुर्घटनमा मृत्यु हुनेमा अन्दाजी ३० वर्षीय चालक कृष्ण चौधरी, कामदार अन्दाजी २३ वर्षीय लक्षीराम चौधरी र अन्दाजी २२ वर्षीय विष्णु चौधरी छन्।
गाडीमा रहेका सहचालक प्रकाश कुमाई भने सकुशल रहेको प्रहरीले जनाएको छ। गाडी पल्टन लागेपछि कुमाईं भने ओट लगाउन गाडीबाट निस्किएका थिए। उनी निस्केकै बेला गाडी पल्टिएको थियो।
करिब दुई सय मिटरमाथिबाट गाडी खसेको थियो। गाडी पल्टँदा ग्यासका सिलिन्डरहरू भने पाखामा छरिएका छन्। केही सिलिन्डर कुच्चिएका, केही सिलिन्डरको ग्यास लिक भएको र केही भने राम्रै अवस्थामा रहेको डीएसपी लम्सालले जानकारी दिए।
अहिले घटनास्थलमा प्रहरी पुगेर लिक भएका सिलिन्डरलाई साइड लगाउने काम भइरहेको जानकारी उनले दिए। ग्यास बोकेको गाडी दुर्घटनामा आगलागी नभएकाले जोखिम कम रहेको उनले बताए। बस्तीभन्दा पर रहेको स्थान दुर्घटनास्थल रहेको र प्रहरीले सतर्कतापूर्वक उद्धारको काम गरिरहेको उनले बताए।
गाडीमा कति सिलिन्डर ग्यास थियो भन्ने खुल्न बाँकी छ। माथिल्लो मोडबाट तल्लो मोडमा खसेको ट्रकका कारण बाटो अवरुद्ध भएको प्रहरीले जनाएको छ।
