काठमाडौं, १५ कार्तिक – नेपाल उद्योग वाणिज्य महासंघको आयोजनामा आगामी मंसीर १७ गतेदेखि २१ गतेसम्म काठमाडौंको भृकुटीमण्डपमा ‘नेपाल अन्तर्राष्ट्रिय व्यापार मेला (Nepal International Trade Fair- NITF)’ हुने भएको छ। क्यालेन्डर इभेन्टको रूपमा प्रत्येक वर्ष आयोजना हुँदै आएको यस मेलाको यो ११औँ संस्करण हो।
यो मेला नेपाल सरकार, उद्योग वाणिज्य तथा आपूर्ति मन्त्रालयको सहयोग, व्यापार तथा निकासी प्रवर्द्धन केन्द्रको प्रवर्द्धन, ललितपुर उद्योग वाणिज्य संघ र नेपाल हस्तकला महासंघको सहआयोजनामा सञ्चालन हुन लागेको हो।
मेलामा चीन, भारत, पाकिस्तान, बंगलादेश र भुटान लगायतका देशहरूको सहभागिता रहनेछ। कुल २०० भन्दा बढी स्टलहरू मार्फत स्वदेशी एवं विदेशी वस्तु तथा सेवाहरूको प्रदर्शन गरिनेछ। यसका साथै, सार्क राष्ट्रसहित चीन, कोरिया, जापान लगायतका देशका क्रेताहरूलाई समेत मेलामा आमन्त्रण गरिएको छ।
- ‘Made in Nepal’ पेभेलियन र वस्तुगत संघहरूको छुट्टै पेभेलियन रहनेछ।
- इलेक्ट्रिक गाडी (EV) हरूको छुट्टै पेभेलियन राखिनेछ।
- हस्तकला, पर्यटन सूचना, प्रविधि एवं व्यावसायिक सूचना, कृषि उत्पादन, ऊर्जा, भवन तथा निर्माण सम्बन्धी शिक्षा आदिका छुट्टाछुट्टै स्टलहरूको व्यवस्था गरिएको छ।
यस मेलाको मुख्य उद्देश्य नेपालको अन्तर्राष्ट्रिय व्यापार प्रवर्द्धन गर्नुका साथै नेपाल व्यापार एकीकृत रणनीति (NTIS) मा विशेष रूपमा पहिचान गरिएका वस्तुहरूको उत्पादन तथा निर्यातमा वृद्धि गर्नु रहेको छ। NTIS अन्तर्गत अलैैंची, चिया, अदुवा, औषधीय तथा सुगन्धित जडिबुटी, हस्तकला तथा पश्मिना, गलैँचा, कफी, नेपाली कागज तथा कागजजन्य वस्तु, तयारी पोशाक लगायतका निर्यातयोग्य वस्तुहरू पर्दछन्।
- मेलाको अवसरमा अन्तर्राष्ट्रिय खरीदकर्तासँग प्रत्यक्ष अन्तरक्रिया गराउने लक्ष्य राखिएको छ।
- नेपाली र चिनियाँ व्यापारीहरू बीच प्रत्यक्ष अन्तरक्रिया कार्यक्रम समेत तय भइसकेको छ।
- विभिन्न देशबाट आउने व्यापारिक प्रतिनिधिहरूसँग भेटघाट तथा द्विपक्षीय व्यापार प्रवर्द्धन र लगानीबारे छलफल हुनेछ।
- यस वर्षको मेलामा स्वदेशी र विदेशी गरी करिब एक लाख अवलोकनकर्ताहरूले अवलोकन गर्ने लक्ष्य राखिएको छ।
- महासंघकै नेतृत्वमा मुलुकभित्र प्रादेशिक, जिल्ला स्तर एवं वस्तुगत रूपमा आयोजना हुने मेलाहरूमा उत्कृष्ट ठहरिएका स्टल तथा उत्पादनहरूलाई यस NITF मा निःशुल्क स्टल उपलब्ध गराइएको छ।
- यस नियमित आयोजनबाट नेपालमा अन्तर्राष्ट्रिय लगानी तथा प्रविधि भित्र्याउन, नेपाली उत्पादनहरूको अन्तर्राष्ट्रिय बजार प्रवर्द्धन गर्न र समग्र मुलुकको अर्थतन्त्रलाई माथि उकास्न सहयोग पुग्ने विश्वास महासंघले लिएको छ।
