नेपाल पर्यटन बोर्डले आयोजना गरेको नेपाल पर्यटन वेलनेस रिल प्रतियोगिता २०२६ मा कोशी प्रदेशबाट मिना कुमारी राउत विजेता बनेकी छिन्। सात प्रदेशबाट एकएक जना गरी ७ जना विजेता छनोट गरिएको हो ।
राउत त्रिभुवन विश्वविद्यालयमा योग विज्ञानमा स्नातकोत्तर गरिरहेकी छिन्। उनी विगत एक दशकदेखि योगमा आबद्ध भएर योग प्रशिक्षकको रुपमा समेत काम गर्दै आएकी छिन् ।
उनले दक्षिण एसियाली स्तरमा योगसँग सम्बन्धित विभिन्न प्रतियोगितामा सहभागी भई स्वर्ण पदक समेत प्राप्त गरेकी छिन् ।
राउतले सन् २०२३ मा आयोजित तेस्रो दक्षिण एसियाली योग खेलकुद प्रतियोगितामा स्वर्ण पदक जित्न सफल भएकी थिइन् । त्यसपछि सन् २०२४ मा सम्पन्न प्रथम भारत नेपाल योगासन खेलकुद च्याम्पियनसिपमा पनि स्वर्ण पदक जित्दै आफ्नो उत्कृष्ट प्रदर्शनलाई निरन्तरता दिइन ।
राष्ट्रिय योग खेलकुद च्याम्पियनसिप २०२४ मा पनि उनले स्वर्ण पदक जितिन्। उत्कृष्ट प्रदर्शनका आधारमा सोही प्रतियोगितामा उनलाई ‘ मिसयोगी २०८० ‘ उपाधि समेत प्रदान गरिएको थियो।
उनले सन् २०२५ मा आयोजित १६औं विश्वकप अर्थात् विश्व योगासन खेलकुदमा नेपालको प्रतिनिधित्व गरेकी थिइन् । त्यसैगरी सातौ राष्ट्रिय योगासन प्रतियोगिता २०८२ मा पुनः स्वर्ण पदक जितेकी थिइन।
ट्रेकिङ गाइड समेत रहेकी राउत विभिन्न हिमाली क्षेत्रमा योग ट्रेकिङ गराउँदै आएकी छिन् । उनले २०२४ मा नेपाल माउन्टेन एकेडेमिबाट ट्रेकिङ गाइडको तालिम लिएकी थिइन् । राउतले विदेशीहरुलाई योग ट्रेकिङ गराउँदै नेपालको पर्यटन र वेलनेसमा टेवा पुर्याउदै आएकी छिन् । विदेशी र नेपालीहरूलाई अनलाइन र फिजिकल योग, साउन्ड हिलिङ सिकाउँदै र पर्यटकलाई नेपाल घुमाउँदै आएकी छिन् ।
राउतको भिडियोमा आवाज दिएर गरिमा काफ्लेले ,भिडियो
खिचेर अर्जुन भुसाल र सुमन आचार्यले सहयोग गरेका थिए भने भिडियो सम्पादनमा मदन कार्की , अर्जुन भुसाल र मिडिया फोकस प्रा. लिमिटेड टिमले गरेको थियो।
प्रतियोगिताअन्तर्गत मधेशबाट सुमित्रा आचार्य, बागमतीबाट एरिक नकर्मी, गण्डकीबाट रोशन ढकाल, लुम्बिनीबाट भास्कर महर्जन, कर्णालीबाट सन्तोष बुढा र सुदूरपश्चिमबाट हिमालय भट्ट विजेता घोषित भएका छन्। प्रत्येक विजेताले नगद ७५ हजार रूपैयाँ पुरस्कार प्राप्त गर्नेछन्।
यसैगरी, जुरी अवार्डतर्फ आशा पौडेल छनोट भएकी छन्। उनले नगद २५ हजार रूपैयाँ पुरस्कार प्राप्त गर्नेछिन्।
प्रतियोगितामा रञ्जीत श्रेष्ठ, कैलाश कार्की, ‘घुमन्ते बुढाबुढी’, किरण अधिकारी र आश्रितलाई ‘स्पेसल मेन्सन’ सम्मान प्रदान गरिएको छ।
नेपाल पर्यटन बोर्डका अनुसार प्रतियोगितामा नेपालभरका १११ जना सिर्जनाकर्ताले सहभागिता जनाएका थिए। सहभागीहरूले हिमालयको प्राकृतिक सौन्दर्य, योग, ध्यान, साउण्ड हिलिङ, आयुर्वेद, आध्यात्मिक पर्यटन तथा प्रकृतिमा आधारित उपचार प्रणालीलाई समेट्दै वेलनेस पर्यटन प्रवर्द्धन गर्ने उद्देश्यका रील तयार गरेका थिए।
प्रतियोगिताका प्रविष्टिको मूल्याङ्कन चलचित्र निर्देशक मिनबहादुर भाम र वेलनेस विज्ञ शोभिता सिम्खडाले गरेका थिए।
बोर्डले प्रतियोगिताले नेपालको मौलिक वेलनेस परम्परा र सचेत जीवनशैलीलाई अन्तर्राष्ट्रिय स्तरमा प्रवर्द्धन गर्न योगदान पुर्याएको विश्वास व्यक्त गर्दै आगामी दिनमा पनि यस्ता सिर्जनात्मक अभियानलाई निरन्तरता दिने जनाएको छ।
