काठमाडाैं । माथिल्लो तामाकोशी जलविद्युत केन्द्रबाट आंशिक रूपमा बिजुली उत्पादन सुरू भएको छ।
४५६ मेगावाटको तामाकोशीमा गत असोज ११ र १२ गतेको वर्षाका कारण आएको पहिरोले क्षति पुर्याएको थियो। क्षतिग्रस्त संरचनाहरूको आंशिक मर्मत गरी ८८ दिनपछि मंगलबार बेलुकाबाट पुनः विद्युत उत्पादन सुरू गरी राष्ट्रिय प्रसारण प्रणालीमा समाहित गरिएको नेपाल विद्युत प्राधिकरणले जनाएको छ।
जसबाट हाल १२० मेगावाट विद्युत उत्पादन भइरहेको छ।
अविरल वर्षाका कारण असोज ११ गते साँझ ७ बजेदेखि केन्द्रबाट विद्युत उत्पादन बन्द गरिएको थियो। असोज १२ गतेको पहिरोले बाँधस्थलभन्दा केही तल दायाँतर्फ रहेका नियन्त्रण कक्ष (कन्ट्रोल रूम) भवन, बालुवा थिग्ग्रयाउने पोखरी (डिस्याण्डर) र बाँधबाट डिस्याण्डरसम्म पानी पुर्याउने भूमिगत नहर (कल्भर्ट) मा क्षति पुगेको थियो।
