बेलायती राजा चार्ल्स तृतीयको राज्याभिषेक भएको छ । वेस्टमिन्स्टर एबीमा भएको समारोहमा उनलाई क्याटरबरीका आर्कबिसपले मुकुट पहिर्याइ दिएका हुन् ।
आर्कबिसपले ३६० वर्ष पुरानो सेन्ट एडवर्डको मुकुट राजाको शीरमा पहिर्याई दिंदै घोषणा गरे, ‘ईश्वरले राजाको रक्षा गरुन् !’ यो राजमुकुट पहिरिने राजा चार्ल्स तृतीय सातौँ शासक हुन् । यसअघि चार्ल्स द्वितीय, जेम्स द्वितीय, विलियम तृतीय, जोर्ज पञ्चम, जोर्ज छैटौँ, अनि एलिजाबेथ द्वितीयाले यो मुकुट पहिरिएका थिए । उक्त राजमुकुट पछिल्लो पटक सन् १९५३ मा महारानी एलिजाबेथले उनको राज्याभिषेकमा पहिरिएकी थिइन् ।
समारोहमा उपस्थित करिब एक सय राज्य प्रमुख, राजारानी र सेलेब्रिटी तथा राजपरिवारका नातेदारहरुले जवाफमा भने, ‘ईश्वरले राजाको रक्षा गरुन् ।’ त्यसपछि राजा चार्ल्स गद्दीमा बसेका थिए ।
