काठमाडौं । नेकपा एमालेका नेता घनश्याम भुसालले पार्टी परित्याग गरेका छन्। पार्टी अध्यक्ष ओलीको दम्भ र स्वेच्छाचारिताको कैदी भएको भन्दै उनले पार्टी परित्यागको घोषणा गरेका हुन् ।
’अहिले यो पार्टी कमरेड के पी शर्मा ओलीको दम्भ र स्वेच्छाचारिताले—केवल दम्भ र स्वेच्छाचारिताको कैदी हुन पुगेको छ,’ सामाजिक सञ्जालमा उनले लेखेका छन्, ’म स्वयंले ४५ वर्षसम्म आफ्नो सम्पूर्ण सामर्थ्य समर्पित गरेको यो पार्टीमा नीति र विधिको पुनर्स्थापना हुने कुनै सम्भावनासमेत नदेखेपछि अध्यक्ष ओलीसँगै रहेर आन्दोलन र आफैंप्रति पनि इमान्दार रहन नसकिने भएपछि यस पार्टीमा नरहने निष्कर्षमा पुगेको छु।’
अध्यक्ष केपी शर्मा ओलीले संसद् विघटनको विपक्षमा उभिने पार्टीका नेताहरुलाई टिकट नदिने नीति लिएपछि एमालेमा तरंग छाएको छ । ओलीले भुसाल र भीम रावलसहितका नेताहरुलाई पन्छाएर उम्मेदवार टुंग्याएका छन्।
उनले प्रतिनिधिसभा सदस्यकाे लागि रूपन्देही क्षेत्र नं १ बाट उम्मेदवारी दिने तयारी गरेकाे जनाइएकाे छ ।
यसअघि निर्वाचन क्षेत्र समन्वय कमिटीले सर्वसम्मत उम्मेदवार सिफारिस गरेका रावललाई ओलीले टिकट नदिएपछि अछाम क्षेत्र नं १ निर्वाचन कमिटीका संयोजक प्रकाश शाहले पदबाट राजीनामा दिइसकेका छन्।
