काठमाडौं । ब्यांकरहरूको संस्था नेपाल ब्यांकर्स संघले चैतदेखि कर्जा र निक्षेपको ब्याजदर घटाउने निर्णय गरेको छ । फागनु २५ मा भएको उक्त निर्णय भोलिदेखि लागू हुने संघले जनाएको छ ।
चैत १ गतेदेखि निक्षेपमा ०.४ प्रतिशत र कर्जामा एक प्रतिशत प्रिमियम दर घटाउने निर्णय भएको ब्यांकर्स संघका अध्यक्ष सुनील केसीले बताए । उनले संघ ऋणको ब्याजदर घटाउनमा केन्द्रित भएको र ब्यांकहरूले यसअघि कर्जामा आधारदरमा ६ प्रतिशतसम्म प्रिमियम लिने गरेका भनेका छन् । अब एक प्रतिशत घटेपछि आधारदरमा पाँच प्रतिशतसम्म प्रिमियम दर तोक्नेछन् ।
यस्तै, निक्षेपतर्फको साधारण बचतमा न्यूनतम ६ प्रतिशतदेखि अधिकतम आठ प्रतिशतसम्म ब्याज दिनेछन्। यसअघि साधारण बचतमा न्यूनतम ६.४२ प्रतिशतदेखि अधिकतम ८.४२ प्रतिशतसम्म ब्याजदर तोकिएको थियो। मुद्दती निक्षेपको ब्याजदर भने स्थिर राखिएको छ। हाल ब्यांकहरूले मुद्दती निक्षेपमा ११ प्रतिशत ब्याज दिइरहेका छन्।
यसैगरी संस्थागततर्फ नौ प्रतिशत र ‘रेमिटेन्स’ मुद्दती खातामा १२ प्रतिशत ब्याजदर तोकिएको छ। यस्तै, विकास ब्यांकहरूको संस्था डेभलपमेन्ट ब्यांकर्स एशोसिएशनले चैतका लागि मुद्दती निक्षेपको ब्याजदर ०.२५ प्रतिशतसम्म घटाएको छ।
संघको निर्णय अनुसार‚ चैत १ देखि विकास ब्यांकहरूको एक वर्षे वा सोभन्दा माथिको व्यक्तिगत मुद्दती निक्षेपको ब्याजदर ११.६० प्रतिशत कायम रहनेछ। त्यस्तै, एक वर्षभन्दा कम अवधिको मुद्दती निक्षेपको ब्याजदर ११.५० प्रतिशत कायम भएको छ। हाल विकास ब्यांकहरूले एकवर्षे वा सोभन्दा बढी दुवैको व्यक्तिगत मुद्दती निक्षेपमा ११.७५ प्रतिशत ब्याजदर दिंदै आएका थिए।
यसैगरी, ब्याजदर घटाएसँगै विकास ब्यांकहरूले चैतमा एकवर्षे वा सोभन्दा माथिको संस्थागत मुद्दती निक्षेपमा ९.६० प्रतिशत र साधारण बचतमा न्यूनतम ९.६० प्रतिशतदेखि ८.६० प्रतिशत ब्याजदर प्रदान गर्नेछन्।
त्यसैगरी, नेपाल वित्तीय संस्था संघ (फाइनान्स)ले मुद्दती निक्षेपको ब्याजदर ०.२० प्रतिशतले घटाएको छ। संघले तीन महीनाभन्दा बढी अवधिको निक्षेपको ब्याजदर ०.१५ प्रतिशत घटाउने निर्णय गरेको छ। फाइनान्स कम्पनीहरूले एक वर्षको मुद्दती निक्षेपमा १२.१० प्रतिशत ब्याज दिंदै आएकामा चैत १ गतेदेखि ११.९० प्रतिशत ब्याजदर कायम हुनेछ।
