काठमाडाैं । चन्द्रागिरि नगरपालिका-०८ मातातीर्थस्थित वडा कार्यालय हातामा आज सो क्षेत्रका ५० वर्ष अघि खिचिएका तस्बिरहरूको प्रदर्शनी हुदैछ ।
क्यानेडियन नागरिक लियो गाैलेटले सन् १९७३ ताका मातातीर्थ क्षेत्रमा खिचेका तस्बिरसहित चन्द्रागिरि नगरपालिका क्षेत्रमा पुराना तस्बिरहरूको प्रदर्शनी बिहान १० बजेबाट सुरू भइरहेकाे वडाध्यक्ष प्रल्हाद रिजालले जानकारी दिएका छन् ।
लियो पहिलोपटक मातातीर्थ क्षेत्रमा आइपुग्नु भएको ५० वर्ष पुगेको अवसर पारेर उहाँसँगको अन्तर्क्रियात्मक कार्यक्रमसहित एक दिने फोटो प्रदर्शनी कार्यक्रम आयोजनाको तयारी गरिएको कार्यक्रम संयोजक जीवन नेपालले बताए ।
प्रदर्शनीमा चन्द्रागिरि नगर क्षेत्रका अन्य पुराना चित्र तथा तस्बिरहरूसमेत समावेश गरिने साथै, माथवरसिंह थापाका पालामा वि.संं १९०१ सालमा नेपाल भ्रमणमा आएका तत्कालीन पर्सियाका राजकुमार फ्रेडरिक विल्हेम वाल्डेमारले थानकोट क्षेत्रमा कोरेका चित्रहरू पनि प्रदर्शनीमा समावेश गरिने संयोजक नेपालले बताए ।
क्यानेडियन नागरिक लियो संयुक्त राष्ट्रसंघीय मिसनमा कार्यरत रहँदा पहिलोपटक सन् १९७३ मा मातातीर्थमा आउनुभएको थियो ।
प्रदर्शनीमा राखिएका १७६ वटा तस्बिर मध्ये ४२ वटा तस्बिर पहिले र अहिले शीर्षकमा समावेश गरिने बताइएको छ।
५ दशक अघि र अहिलेको गाउँघरमा कस्तो परिवर्तन आयो भन्ने विषयको अध्ययनका लागि प्रदर्शनी फलदायी हुने अपेक्षासहित प्रदर्शनी आयोजना गर्न लागिएको वडाध्यक्ष रिजालले बताए ।
प्रदर्शनीमा समावेश हुने सबै तस्बिरहरू नेपालका पुराना तस्बिरहरू संकलन गर्ने संस्था फोटो म्युजियम नेपालले उपलब्ध गराएको बताइएको छ।
