काठमाडाैं । बन्दीपुर केवलकार एन्ड टुरिजम लिमिटेडले आगामी साउन ६ गतेदेखि आफ्नो प्रारम्भिक सार्वजनिक निष्काशन (आईपीओ) प्रक्रिया सुरु गर्ने भएको छ।
कम्पनीले यो आईपीओ आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि छुट्याएर ल्याउन लागेको हो।
कम्पनीले कुल २ अर्ब ८३ करोड रुपैयाँ जारी पूँजीको २०.७०६७ प्रतिशत हिस्सा अर्थात् ५८ करोड ६० लाख रुपैयाँ बराबरको ५८ लाख ६० हजार कित्ता साधारण शेयर निष्काशन गर्ने स्वीकृति प्राप्त गरिसकेको छ।
यस अन्तर्गत, ५ करोड ६६ लाख रुपैयाँ बराबरको ५ लाख ६६ हजार कित्ता शेयर आयोजना प्रभावित स्थानीय बासिन्दाहरूका लागि छुट्याइएको छ। यो शेयर प्रति कित्ता १०० रुपैयाँको दरमा उपलब्ध हुनेछ।
स्थानीय बासिन्दाका रूपमा तनहुँ जिल्लाको बन्दीपुर गाउँपालिकाका सबै वडा, आँबुखैरेनी गाउँपालिकाका सबै वडा, भानु नगरपालिका वडा नं। १, र गोरखा जिल्लाको पालुङ्गटार नगरपालिका वडा नं ७ का स्थायी बासिन्दाहरूले आवेदन दिन सक्नेछन्।
त्यस्तै, विदेशमा रोजगारीमा रहेका नेपालीहरूका लागि पनि कम्पनीले छुट्टै आईपीओ ल्याएको छ। यसमा १० प्रतिशत शेयर अर्थात् ५ करोड २९ लाख ४० हजार रुपैयाँ बराबरको ५ लाख २९ हजार ४०० कित्ता शेयर निष्काशन गरिनेछ। यसमा पनि प्रति कित्ता मूल्य १०० रुपैयाँ नै तोकिएको छ।
उक्त आईपीओमा लगानीकर्ताले न्यूनतम १० कित्तादेखि अधिकतम २० हजार कित्तासम्मका लागि आवेदन दिन सक्नेछन्।
आयोजना प्रभावित क्षेत्रका लागि शेयर निष्काशन साउन ६ गतेदेखि खुला भई छिटोमा साउन २० गते र ढिलोमा भदौ ४ गतेसम्म खुला रहनेछ।
त्यस्तै, वैदेशिक रोजगारमा रहेका नेपालीहरूका लागि निष्काशन छिटोमा साउन ९ गते र ढिलोमा साउन २० गतेसम्म खुला रहनेछ।
