कोटश्वर तेक्वान्दो प्रतियोगिता सम्पन्न

तेक्वान्दो खेल्न सुरु गरेका नयाँ खेलाडीलाई प्रतिस्पर्धाको अवसर प्रदान गर्नुका साथै उनीहरुको मनोबल बढाउने उद्देश्यले कोटेश्वर तेक्वान्दो डोजाङको आयोजनामा १२ औं अन्तरडोजाङ तेक्वान्दो प्रतियोगिता शनिबार सम्पन्न भएको छ ।
प्रतियोगिताको राष्ट्रिय खेलकुद परिषद् (राखेप) कार्यकारी समितिकी सदस्य सुर्वण श्रेष्ठले उद्घाटन गर्दै कोटेश्वर तेक्वान्दो डोजाङले खेलाडी उत्पादनमा गरेको मिहिनेतको प्रशंसा गरिन् ।
उद्घाटनका अवसरमा राखेपका सदस्य विदुर ढुङ्गाना, आईटीएफ तेक्वान्दोका अध्यक्ष प्रविनकुमार कार्की, का.म.न. वडा नं. ३२ की सदस्य सिता विसुंखे, नेपाली काग्रेसका युवा नेता अर्जुन पराजुली, तेक्वान्दोका पूर्व मुख्य प्रशिक्षक धु्रव गुरुङ, अखिल नेपाल तेक्वान्दो एकेडेमीका अध्यक्ष अनुयाज गौतम लगायतको उपस्थिति रहेको थियो ।
कोटेश्वर तेक्वान्दो डोजाङका संस्थापक तथा राखेपका तेक्वान्दो वरिष्ठ प्रशिक्षक नविनकुमार श्रेष्ठले प्रतियोगिताको उद्देश्य प्रकाश पार्दै भने– ‘नयाँ खेलाडीलाई प्रतियोगितामा सहभागी गराएर प्रतियोगिता सम्बन्धी ज्ञान र सीप बारे जानकारी गराउनु, प्रशिक्षकलाई आफना खेलाडीको मुल्यंकन गर्ने अवसर प्रदान गर्नु, निर्णायकलाई आफ्नो भूमिका सम्बन्धी ज्ञान दिने उद्देश्यले प्रतियोगिताको सुरुआत गरेका हौ ।’
एकदिने प्रतियोगितामा उपत्यकाका १३ वटा डोजाङ तथा स्कुलका ७६ महिला र १ सय ६७ पुरुष गरी कुल २ सय ४३ खेलाडीको सहभागिता रहेको आयोजकले जनाएको छ ।