काठमाडौं । आज भाद्र कृष्ण अष्टमीको दिन, देशभर श्रीकृष्ण जन्माष्टमी पर्व मनाइँदैछ ।
भगवान विष्णुका आठौं अवतार श्रीकृष्णको जन्मोत्सवका रूपमा यो पर्वलाई विशेष भक्ति र उल्लासका साथ मनाइन्छ । यस अवसरमा काठमाडौं उपत्यका र देशभरका कृष्ण मन्दिरहरूमा बिहानैदेखि भक्तजनहरूको घुइँचो लाग्ने गर्दछ ।
विशेषगरी ललितपुरको पाटन दरबार स्क्वायरमा अवस्थित ऐतिहासिक कृष्ण मन्दिर मा बिहानैदेखि दर्शनार्थीहरूको लामो लाइन लागेको छ।
मन्दिरलाई फूलमाला, बत्ती र विभिन्न सजावटले आकर्षक रूपमा सिँगारिएको छ। मन्दिर व्यवस्थापनले दर्शनार्थीहरूको सहजताका लागि विशेष सुरक्षा र व्यवस्थापन मिलाएको छ।
के हो जन्माष्टमीको महत्त्व?
हिन्दू धर्मशास्त्रअनुसार, द्वापर युगमा भाद्र कृष्ण अष्टमीको मध्यरातमा कंसको कारागारमा माता देवकीको गर्भबाट भगवान श्रीकृष्णको जन्म भएको थियो।
भगवान श्रीकृष्णले समाजमा नैतिकता, सद्भाव र धर्मको स्थापनाका लागि महत्त्वपूर्ण भूमिका खेलेका थिए। यसैले आजको दिनलाई अन्यायमाथि न्यायको विजयको प्रतीकका रूपमा पनि लिइन्छ।
