काठमाण्डौ । पुष ५, संस्कृति, पर्यटन तथा नागरिक उड्डयनमन्त्री सुदन किरातीको राजीनामा माग्दै काठमाण्डौमा प्रदर्शन भएको छ ।
धर्मको बारेमा मन्त्री किरातीले दिएको अभिव्यक्तिको विरोध गर्दै राष्ट्रिय प्रजातन्त्र पार्टी ९राप्रपा० को भ्रातृ सङ्गठन नेपाल सनातन धर्म संस्कृति सङ्गठनले आज बिहीवार पशुपतिनाथ मन्दिर क्षेत्रमा प्रदर्शन गरेको हो ।
हिजो बुधवार भएको एक कार्यक्रममा मन्त्री किरातीले क्रिस्चियनलाई नमान्नेहरू संविधान विरोधी भएको र उनीहरूलाई जेल हाल्नुपर्ने अभिव्यक्ति दिनुभएको थियो । यो अभिव्यक्तिलाई लिएर हिन्दु धर्मसँग सम्बन्धित सङ्घ–संस्थाले विरोध जनाएका छन् । तर मन्त्री किरातीले आज सामाजिक सञ्जालमार्फत स्पष्टीकरण दिँदै आफूले धर्मनिरपेक्ष देशमा सबै धर्म बराबर हुने आफ्नो अभिव्यक्तिको आशय रहेको बताउनुभएको छ । संविधानले नै देशलाई धर्मनिरपेक्ष घोषणा गरेको सन्दर्भमा कुनै धर्मप्रति घृणा फैलाउन नहुनेमा आफ्नो जोड रहेको उहाँको भनाइ छ ।
आफू हिन्दु, बौद्ध, मुस्लिम, क्रिस्चियन सबै धर्मावलम्बीका कार्यक्रममा जाने गरेको भन्दै मन्त्री किरातीले भाषणलाई तोडमोड नगर्न आग्रह पनि गर्नुभएको छ ।
