साउन २१, काठमाडौं । नेपाल पत्रकार महासंघ ललितपुर शाखाको समन्वयमा शनिबार डेढ सय बढी पत्रकारले राष्ट्रिय परिचय-पत्रका लागि बायोमेट्रिक दिएका छन् ।
जिल्ला प्रशासन कार्यालय ललितपुर र राष्ट्रिय परिचयपत्र इकाइको प्राविधिक सहयोगमा शनिबार जिल्लामा कृयाशील १ सय ६३ जना पत्रकारले राष्ट्रिय परिचय-पत्रका लागि विवरण दिएका हुन ।
कार्यक्षेत्रमा खटिनुपर्ने पत्रकारलाई सरकारले चलाएको अभियानमा सहभागी गराइएको महासंघ ललितपुरका अध्यक्ष सागर न्यौपानेले बताए । जिल्लामा आबद्ध पत्रकार साथीहरु कार्यक्षेत्रमा व्यस्त हुनुपर्दा घण्टौँ लाइनमा बस्न सम्भव थिएन, ’राज्यको अभियानमा पत्रकार सहभागी भएर आम नागरिकलाई राष्ट्रिय परिचय-पत्र बनाउन उत्प्रेरित गर्न महासंघले समन्वय गरेको हो । यसमा उत्साहजनक सहभागिता भयो, ।
राष्ट्रिय परिचय पत्र जिल्ला प्रशासन कार्यालयस्थित राष्ट्रिय परिचय इकाइका प्रमुख हरि राउतले सरकारको अभियानमा पत्रकार महासंघ ललितपुरले साथ दिएको बताए ।
सरकारको राष्ट्रिय अभियानमा पत्रकार महासंघ ललितपुरले साथ दिएको छ, जनताको सेवा जुनसुकै बेला हामी गर्न तयार छौँ, राउतले भने, ’ समयमै राष्ट्रिय परिचय बनाए सहज हुनेछ।’
शनिबार बिहान ८ बजेदेखि १२ बजेसम्म राष्ट्रिय परिचय पत्रका लागि विवरण लिइएको थियो । सार्वजनिक बिदाको दिन भएकोले पत्रकार महासंघसँग सहकार्य गर्न सहज भएको राष्ट्रिय परिचयपत्र इकाइका व्यवस्थापन कक्षका सुपरभाइजर साजन न्यौपानेले बताए।
हाल ललितपुर महानगरका १ देखि १४, १६,१७,१९ र २० नम्बर वडामा वडास्तरीय अभियान चलिराखेको । बाँकी ११ वटा वडामा पनि साउन मसान्त भित्रमा अभियान सञ्चालन गरिने बताए । ललितपुर जिल्लाको महानगरपालिकामा राष्ट्रिय परिचयपत्र बनाउने अभियान चलिरहेको छ ।
