गोलन्जोर, सिन्धुली । ब्याक टु लाइफ जर्मनीको सहयोग र सिएसडिएस सिन्धुलीको व्यवस्थापनमा गोलान्जोर गाउँपालिका ३, मा एकघर एक धारा खानेपानी आयोजना उद्घाटन गरिएको छ ।
मुर्की र थाँक्रेका बासिन्दा वर्षौंदेखि खानेपानीका लागि सास्ती व्यहोर्दै आएका थिए । महिलाहरूले खाने पानीका लागि दैनिक दुईदेखि तीन घण्टा खर्चदै आएका थिए। घर आँगनमै धाराबाट निरन्तर स्वच्छ पानीको पहुँच पुगेको छ । जसले उनीहरूको दैनिक जीवनमा सहजता ल्याएको छ ।
उद्घाटन कर्यक्रमलाई सम्बोधन गर्दे गाउँपालिका अध्यक्ष शंकरराज बरालले गाउँगाउँमा खानेपानी पुर्याउने सपना यथार्थमा परिणत भएको बताए।
उनले भने ‘आयोजनाले समुदायको स्वास्थ्य, समयको बचत, शिक्षामा पहुँच र श्रमको उचित प्रयोगमा महत्त्वपूर्ण सुधार ल्याउने छ। यो केवल एउटा योजना मात्र होइन, जीवनशैलीको रूपान्तरण हो।”
सिएसडिएस सिन्धुलीका प्रतिनिधि विष्णु पौडेलले आयोजना पूर्वाधारको रूपमा मात्र नभई स्थानीय सशक्तीकरणको प्रतीक को रूपमा समेत रहेकाे बताए । उनले योजना चयनदेखि कार्यान्वयन र अपनत्व ग्रहण गर्ने कार्यमा समुदायले जुन प्रतिबद्धता देखायो, त्यसले हामीलाई यसको दिगोपनाको उज्ज्वल सम्भावना देखाएको धारणा राखे ।
गाउँपालिका उपाध्यक्ष ज्वालाप्रसाद न्यौपानेले सफा पानी पाउनु सुविधा मात्र नभएर जनताको अधिकार समेत रहेका बताए । उनले यस्ता परियोजनाहरूले देशलाई समृद्धकाे बाटोम अघि बढाउने धारणा राख्नुभयो ।
