काठमाडौं । त्रिवि पत्रकारिता केन्द्रीय विभागका पूर्वविद्यार्थीको अल्मुनाइ गठन गरेको छ ।
त्रिभुवन विश्वविद्यालयअन्तर्गत पत्रकारिता तथा आमसञ्चार केन्द्रीय विभागमा अध्ययन गरेका विद्यार्थीको सम्पन्न एक भेलाले पूर्व विद्यार्थीहरुको अल्मुनाई गठन गरेको हो ।
विभागीय प्रमुख प्रा. चिरञ्जीवि खनालको उपस्थितिमा भएको भेलाले माधवप्रसाद तिवारीको अध्यक्षतामा तदर्थ समिति गठन गरेको हो । समितिको उपाध्यक्षमा लीला भट्टराई, सचिवमा शन्तराम बिडाँरी र कोषाध्यक्षमा पूर्णिमा पराजुली हुनुहुन्छ । भेलामा विभागका प्रमुख प्रा खनालले पत्रकारिता अध्ययन गरेका पूर्वविद्यार्थीहरु विभिन्न सञ्चारमाध्यमका साथै देशदेशान्तरमा कार्यरत हुन पुगेको स्थितिमा अल्मुनाइले ती सबैलाई जोड्ने सेतु बन्न सक्ने बताउनुभयो । विश्वविद्यालयले २०५८ सालदेखि पत्रकारिता तथा आमसञ्चार विषयमा स्नातकोत्तर, २०६७ सालदेखि विद्यावारिधि तथा २०७४ सालदेखि दर्शनाचार्य तथा विद्यावारिधि तहको अध्यापन प्रारम्भ गरेको छ ।
तदर्थ समितिको सदस्यमा लोकेन्द्र केसी, हेलिना राई, बाबुराम तिमिल्सिना, सुनिल पौडेल, प्रविण पोखरेल, कुमारसिंह विष्ट, सौगात मिश्र, सोमप्रसाद डोटेल र सन्तोष रोकाय हुनुहुन्छ । केन्द्रीय बिभागबाट स्नातकोत्तर, दर्शनाचार्य र विधावारिधि गरिसकेका सबै विद्यार्थीलाई समेटेर सङ्गठन विस्तार गर्ने र अल्मुनाइमार्फत प्राज्ञिक गतिविधिसहित विविध कार्यक्रम आयोजना गरिने योजना बनाइएको छ ।
भेलाले यो अभियानमा साथ दिन सबैलाई अपिल समेत गरेको छ ।
