काठमाडौँ । काठमाडौँ महानगरपालिकाले ४ वटा सामुदायिक विद्यालयले भाडामा लगाएका ६१ वटा सटरमा ताला लगाएको छ ।
महानगरको शिक्षा विभागले आइतबार व्यवसायिक प्रयोजनमा लगाएका ६१ सटरमा ताला लगाएको हो ।
महानगरको शिक्षा विभाग, महानगर प्रमुखको सचिवालय र महानगर प्रहरी बलसहितको टोलीले विद्यालयमा पुगेर व्यवसायिक प्रयोजनमा आएका सटर तथा टहराहरुमा ताला लगाएको हो ।
यसरी ताला लगाइएका सटरहरुमध्ये रामशाह पथमा रहेको पद्मोदय माध्यमिक विद्यालयले भाडामा दिएका १७ वटा सटर, बागबजारमा रहेको सहिद शुक्र मावि ले भाडामा दिएका २२ वटा सटर, विजय स्मारक मावि डिल्लीबजारले भाडामा लगाएका ८ वटा सटर र पदमकन्या मा वि डिल्लीबजारले भाडामा लगाएका १४ वटा सटर रहेका छन् ।
महानगरले पछिल्लो समय महानगरभित्रका सामुदायिक विद्यालयका सटरलाई व्यवसायिक प्रयोजनमा भाडामा नलगाउन आग्रह र निर्देशन गर्दै आएको छ । महानगरले विद्यालय परिसरका संरचना विद्यालय प्रयोजनमा प्रयोग गर्न निर्देशन दिँदै आएको हो ।
