काठमाडाैं । काठमाडाैं महानगरपालिकाले थापाथलीस्थित बागमती किनारमा अनाधिकृत बस्ती हटाउन गृह मन्त्रालयसँग सहयोग मागेको छ । बुधबार प्रमुख प्रशासकीय अधिकृत बसन्त अधिकारीले गृह मन्त्रालयलाई पत्र लेखी अनाधिकृत संरचना हटाउन अभियानकै रुपमा बढाउनु पर्ने भएकाले समन्वय गर्न अनुरोध गरेको हो।
‘अतिक्रमण गरी निर्माण भएका अनधिकृत संरचनाहरू हटाउने कार्य अभियानकै रूपमा अगाडि बढाउनु पर्ने देखिन्छ। जसको लागि तहाँमार्फत् सम्बन्धित जिल्ला प्रशासन तथा सुरक्षा निकायलाई आवश्यक निर्देशन एवं समन्वय हुन अनुरोध गरिन्छ,’ पत्रमा लेखिएको छ ।
बागमती सभ्यता एकीकृत विकास परियोजना समेतबाट अनुरोध भएकाले सो क्षेत्र खाली गर्न प्रयास र समन्वय गरेको महानगरले जनाएको छ । बागमती किनाराका अव्यवस्थित बसोबास हटाइ सौन्दर्यकरण गरी संरक्षण गर्ने एकीकृत विकास परियोजनाले जनाएको छ ।
अनाधिकृत बस्ती हटाउन पहल गरे पनि महानगर सफल हुन नसकेको पत्रमा लेखिएको छ । थापाथलीस्थित उल्लेखित क्षेत्रमा रहेका अनाधिकृत संरचना हटाई सौन्दर्यकरणको कार्य तत्काल गर्ने पनि महानगरले लेखेको पत्रमा उल्लेख छ । बस्ती हटाउनका लागि आवश्यक सहयोगका गर्न महानगरले अनुरोध गरेको छ ।
