सिन्धुली । विहीबारदेखिको अविरल वर्षाका कारण आएको बाढीले सिन्धुलीमा दुइजनाको मृत्यु भएको छ । केही घर बगाउनुको साथै केही डुबानमा परेका छन् । खुर्कोट बसपार्क क्षेत्र डुबानमा परेको छ भने राजमार्गहरु अवरुद्ध भएका छन् ।
बीपी, पुष्पलाल र मदन भण्डारी तीनवटै राजमार्ग ठप्प भएको छ । सुनकोसी गाउँपालिका १ दुम्जामा पहिरोमा परेर १२ वर्षीय बालक विनय कोइरालाको मृत्यु भएको छ । पहिरो खसेपछि भाग्नेक्रममा पुरिएर बालक कोइरालाको मृत्यु भएको प्रहरीले जनाएको छ ।
कमलामाइ नगरपालिका ९ को सुकेखोलाले बगाउँदा स्थानीय ४६ वर्षीय कृष्णबहादुर बोगटीको मृत्यु भएको सिन्धुली प्रहरी प्रमुख एसपी गोविन्दराज काफ्लेले जानकारी दिएका छन् ।
गोलन्जोर गाउँपालिका ७ को खुर्कोट बसपार्क क्षेत्रमा सुनकोसी नदीको बाढी पस्दा दर्जनौं घर बगाएको छ भने केही पक्की घर डुबानमा परेका छन् ।
दिनको समय भएकाले मानवीय क्षति भने नभएको स्थानीयले बताएका छन् ।
सिन्धुली रामेछाप जोड्ने खुर्कोटको पक्की पुलको आधा भाग बगाएको छ । सिन्धुलीतर्फको पुलको आधा भाग भने बाँकी रहेको छ । खुर्कोट बसपार्क तथा आसपासका क्षेत्रका विस्थापितहरुलाइ जनता माविमा राखिएको प्रहरीले जनाएको छ ।
वीपी राजमार्गको नेपालथोक–धुलीखेल खण्ड अन्तर्गत सुनकोसी गाउँपालिका १ नेपालथोक नजिक रोशी खोलाको बाढीले करिब एकसय मिटर सडक बगाएको छ । कालोपत्रे सहितको सडक बगाएर खोलाको बाढी भित्तामा नै पुगेकाले नघटेसम्म यातायात सञ्चालन हुन नसक्ने बताइएको छ ।
वीपी राजमार्गको कमेरेमा पनि पहिरो खसेको छ । दुम्जाको कुशेश्वर महादेव मन्दिरलाइ रोशी खोला र सुनकोसीले घेरेर फसेका २८ जना बटुक सहित ३३ जनाको हेलिकप्टरबाट उद्धार गरिएको प्रहरीले जनाएको छ । गोलन्जोर गाउँपालिका ३ को मुर्कीवेंसीका सयजना स्थानीयलाई कौशिका मावि ग्वाल्टारमा आश्रय दिइएको बताइएकाे छ ।
