काठमाडौं । संयुक्त राष्ट्रसंघका महासचिव एन्टोनियो गुटरेसले संघीय संसदको दुवै सभालाई सम्बोधन गर्ने भएका छन् ।
महासचिव गुटरेसले संसदमा सम्बोधन गर्ने भएपछि संसद भवनलाई ध्वजापताकाले सिँगारिएको छ भने भवन आसपासका बगैँचामा सरसफाइ गरिएको छ ।
यही कार्तिक १४ गते अपराह्न ४ बजे राष्ट्रसंघका महासचिवले नेपालको संसदलाई सम्बोधन गर्नेबारे सरकारले संघीय संसद सचिवालयलाई जानकारी गराइसकेको छ ।
सोही अनुसार संघीय संसद सचिवालयले महासचिवको स्वागतका लागि आन्तरिक तयारी गरेको हो ।
संघीय संसद सचिवालयका प्रवक्ता एकराम गिरीले महासचिवको सम्बोधनका लागि संसद सचिवालयले आन्तरिक तयारी गरिरहेको बताएका छन् ।
मंगलबार महासचिव गुटरेसले प्रतिनिधि सभा र राष्ट्रिय सभाको संयुक्त बैठकमा सम्बोधन गर्नेछन् । सो बैठकमा संघीय सांसदहरुका अलावा संवैधानिक अंगका प्रमुख, विदेशी राजदूत तथा कूटनीतिक अधिकारीहरू पनि सहभागी हुनेछन् ।
संयुक्त राष्ट्रसंघको ७८ औं महासभामा भाग लिन अमेरिकाको न्यूयोर्क गएका बेला प्रधानमन्त्री प्रचण्डले महासचिव गुटरेसलाई नेपाल भ्रमणको निम्ता दिएका थिए । सोही निम्ता अनुसार महासचिव गुटरेस आइतबार बेलुका काठमाडौँ आइपुगेका छन् । नेपाल आए लगतै उनी उच्चस्तरीय भेटघाटमा व्यस्त रहेका छन् ।
