काठमाडौं । पश्चिमा न्युन चापीय प्रणालीका प्रभावका कारण काठामाडौं उपत्यका सहित देशका पहाडी भागमा वर्षा भइरहेको छ । हिमाली क्षेत्रमा हिमपातको सम्भावना रहेको जल तथा मौसम पूर्वानूमान महाशाखाले जनाएको छ।
महाशाखाका अनुसार आगामी चौबिस घण्टामा कर्णाली प्रदेशका साथै सुदूरपश्चिम प्रदेशका पहाडी भू–भागका धेरै स्थानहरूमा मेघ गर्जन चट्याङ सहित हल्का देखि मध्यम वर्षा हुने जनाएको छ।
त्यसैगरी लुम्बिनी प्रदेश र गण्डकी प्रदेशका साथै सुदूरपश्चिम प्रदेशका तराई भू–भागका केही स्थानहरू तथा देशका बाँकी पहाडी भू–भागका थोरै स्थानहरूमा मेघ गर्जन चट्याङ सहित हल्का वर्षाको सम्भावना रहेको छ ।
सुदूरपश्चिम प्रदेश र कर्णाली प्रदेशका उच्च पहाडी तथा हिमाली भू–भागका धेरै स्थानहरूमा, गण्डकी प्रदेशका उच्च पहाडी तथा हिमाली भू–भागका केही स्थानहरूमा र बाँकी प्रदेशका उच्च पहाडी तथा हिमाली भू–भागका थोरै स्थानहरूमा हल्का देखि मध्यम हिमपातको सम्भावना रहेको जनाएको छ ।
मौसमविद् डा. विनोद पोख्रेलले हिजोदेखि सुदुरपश्चिम र कर्णालीका धेरै स्थानमा वर्षा जारी रहेको जनाएका छन् । तराई क्षेत्र बाहेक काठमाडौं उपत्यका सहित देशका धेरै स्थानमा आज दिनभरी वर्षा हुने राम्रो सम्भावना रहेको जानकारी दिए ।
